संघर्ष नायक वृत्तसेवा पारगाव (ता.२६)
पारगाव (ता. दौंड) : येथील खंडोबा नगर परिसरात गणराज एंटरप्राइजेसच्या गोडाऊनला काल मध्यरात्री भीषण आग लागून लाखो रुपयांचे नुकसान झाले. या घटनेत सुदैवाने कोणतीही जीवितहानी झाली नसून वेळेत खबरदारी घेतल्यामुळे मोठा अनर्थ टळला.
मिळालेल्या माहितीनुसार, पारगाव चौकात गणराज एंटरप्राइजेस नावाने इलेक्ट्रिक, स्टेशनरी, भांडी व हंगामी वस्तूंचे मोठे दुकान चालवणारे नवनाथ रसाळ यांच्या घरालगत तिन्ही बाजूंनी गोडाऊन होते. काल रात्री साडेबारा वाजण्याच्या सुमारास गोडाऊनला आग लागल्याचे लक्षात येताच रसाळ यांनी तत्काळ घरातील सर्व सदस्यांना बाहेर काढले. त्यामुळे संभाव्य जीवितहानी टळली.
गोडाऊनमध्ये मोठ्या प्रमाणात प्लास्टिक व सजावटीच्या वस्तू असल्याने आगीने क्षणार्धात रौद्ररूप धारण केले. धुराचे प्रचंड लोट व ज्वाळा दूरवरून दिसत होत्या. आग आटोक्यात आणण्यासाठी दौंड, कुरकुंभ आणि वाघोली येथून अग्निशमन दलाच्या गाड्या घटनास्थळी दाखल झाल्या. पहाटे साडेपाच वाजेपर्यंत आग विझविण्याचे काम सुरू होते.
या आगीत गोडाऊनमधील सर्व साहित्य जळून खाक झाले असून लाखो रुपयांचे नुकसान झाल्याचा प्राथमिक अंदाज आहे. आग लागण्याचे नेमके कारण अद्याप समजू शकलेले नाही.
नवनाथ रसाळ यांनी टेलरिंग व्यवसायातून सुरुवात करून अल्पावधीत उभा केलेला हा व्यवसाय या घटनेमुळे मोठ्या संकटात सापडला आहे. या दुर्घटनेमुळे परिसरात हळहळ व्यक्त केली जात आहे.
मुख्य संपादक:
