दौंड, यवतसह वडगाव निंबाळकर आणि जेजुरीतील गुन्ह्यांचा उलगडा; जामखेडमधून दोघांना घेतले ताब्यात
यवत वार्ताहर (ता.११)
दौंड तालुक्यासह पुणे ग्रामीण जिल्ह्यातील विविध पोलीस ठाण्यांच्या हद्दीत घडलेल्या सोन्याचे दागिने चोरी व जबरी चोरीच्या सहा गुन्ह्यांचा उलगडा करण्यात पुणे ग्रामीण पोलिसांच्या स्थानिक गुन्हे शाखेला आणि दौंड पोलिसांना यश आले आहे. या प्रकरणी दोन आरोपींना अहिल्यानगर जिल्ह्यातील जामखेड येथून ताब्यात घेण्यात आले असून, त्यांच्याकडून सुमारे ५५ ग्रॅम वजनाचे सोन्याचे दागिने आणि मोटारसायकल असा एकूण नऊ लाख रुपये किमतीचा मुद्देमाल हस्तगत करण्यात आला आहे.
दीपक बलभीम पवार (वय २८, रा. आरोळे वस्ती, ता. जामखेड, जि. अहिल्यानगर) आणि युवराज सचिन लोखंडे (वय २४, रा. उद्धट, ता. इंदापूर, जि. पुणे) अशी ताब्यात घेण्यात आलेल्या आरोपींची नावे आहेत.
गुन्ह्यांच्या कार्यपद्धतीचा अभ्यास करून तपास
दौंड पोलीस ठाण्याच्या हद्दीत जबरी चोरीची घटना घडल्यानंतर पुणे ग्रामीणचे पोलीस अधीक्षक संदीप सिंह गिल्ल यांनी स्थानिक गुन्हे शाखेच्या पथकाला मालमत्तेविषयक गुन्हे उघडकीस आणण्याच्या सूचना दिल्या होत्या. त्यानुसार तपास पथकाने गुन्हे घडलेली ठिकाणे, घटनांची वेळ आणि आरोपींची कार्यपद्धती यांचा अभ्यास केला. समान कार्यपद्धती असलेल्या गुन्ह्यांची माहिती एकत्रित करून गोपनीय माहितीच्या आधारे तपासाला दिशा देण्यात आली.
या तपासादरम्यान संबंधित गुन्ह्यांमध्ये दीपक पवार आणि युवराज लोखंडे यांचा सहभाग असल्याची माहिती पथकाला मिळाली. दोघेही जामखेड परिसरात असल्याची माहिती मिळाल्यानंतर पोलिसांनी तेथे जाऊन त्यांना ताब्यात घेतले. चौकशीदरम्यान त्यांनी सहा गुन्ह्यांमध्ये सहभाग असल्याची कबुली दिल्याचे पोलिसांनी सांगितले.
दौंड, यवतसह चार पोलीस ठाण्यांतील गुन्हे उघड
पोलिसांनी दिलेल्या माहितीनुसार, उघडकीस आलेल्या सहा गुन्ह्यांमध्ये दौंड पोलीस ठाण्यातील दोन, यवत पोलीस ठाण्यातील दोन, वडगाव निंबाळकर पोलीस ठाण्यातील एक आणि जेजुरी पोलीस ठाण्यातील एका गुन्ह्याचा समावेश आहे.या प्रकरणांमध्ये दौंड पोलीस ठाणे, यवत पोलीस ठाणे वडगाव निंबाळकर पोलीस ठाणे तसेच जेजुरी पोलीस ठाणे यांचा समावेश आहे.
ही कारवाई पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार आणि दौंड उपविभागाचे उपविभागीय पोलीस अधिकारी बापूसाहेब धडस यांच्या मार्गदर्शनाखाली करण्यात आली.स्थानिक गुन्हे शाखेचे पोलीस निरीक्षक प्रमोद क्षीरसागर, दौंड पोलीस ठाण्याचे पोलीस निरीक्षक हेमंत शेंडगे, पोलीस उपनिरीक्षक ज्ञानेश्वर राऊत, दौंड पोलीस ठाण्याचे पोलीस उपनिरीक्षक शंकर वाघमारे तसेच स्थानिक गुन्हे शाखाचे पोलीस हवालदार गुरुनाथ गायकवाड विकास कापरे दौंड पोलीस ठाण्यातील पोलीस अंमलदारांनी या कारवाईत सहभाग घेतला असून पुढील तपास दौंड पोलीस करत आहेत.























