यवत वार्ताहर (ता.११)
दौंड तालुक्याच्या यवत पोलीस ठाण्याच्या हद्दीत यवत, भांडगाव,खोर,खुटबाव,गाडमोडी,खामगाव, राहू,देलवडी यां गावात मोठया प्रमाणावर मटका व्यवसाय खुलेआम सुरु असल्याने या अवैध व्यवसायाला कोण पाठबळ देत आहे असा संतप्त सवाल महिला आणि नागरिकांच्यातून केला जात आहे.कमी पैशांतून भरपूर पैसे मिळवण्याचे आमिष, एका आकड्यावर नशीब आजमावण्याची हौस आणि ओपन-क्लोजच्या निकालावर लागणारा पैशांचा डाव… या चक्रात अडकून नागरिक मोठ्या आर्थिक संकटात सापडण्याचा धोका वाढत गेला असल्याचे विदारक चित्र सध्या यवत आणि परिसरातील पंचक्रोशीत पाहायला मिळत असल्याने यामुळे मटका जुगाराचा विषय पुन्हा एकदा मोठ्या चर्चेत आला आहे. झटपट पैसा कमावण्याच्या अपेक्षेने काही जण या जुगाराकडे वळत असल्याचे बोलले जात आहे.मात्र यातून गोरगरीब नागरिक मात्र पुरते कर्जबाजारी होत असल्याच्या तक्रारी देखील महिला वर्गातून केल्या जात आहेत.यामुळे मटका जुगाराकडे गांभीर्याने पाहण्याची गरज निर्माण झाली असून यावर पोलीस प्रशासनाने ठोस कारवाई करावी अशी देखील मागणी जोर धरत आहे.
मटका जुगारात सुरुवातीला थोडी रक्कम लावून मोठा फायदा मिळवण्याची आशा दाखवली जाते. एखाद्या वेळी पैसे मिळाले, तर पुन्हा अधिक रक्कम लावण्याचा मोह होतो. मात्र, अपेक्षित निकाल न लागल्यास नुकसान भरून काढण्यासाठी पुन्हा पैसे लावण्याचे चक्र सुरू होते. यातून बचतीची रक्कम संपणे, उसनवारी वाढणे आणि कर्जाचा बोजा डोक्यावर येणे, अशा समस्या निर्माण होतात. परिणामी या प्रकाराचा आर्थिक फटका कुटुंबातील इतर सदस्यांनाही बसण्याची शक्यता असते.आणि त्यामुळे कौटुंबिक वादविवाद आणि कर्जबाजारी पणामुळे जीविताशी निगडित काही समस्या देखील तयार होण्याची शक्यता नाकरता येत नसल्याचे बोलले जात आहे.यवत आणि वरील पंचक्रोशीत असणाऱ्या गावा गावात सध्या ओपन-क्लोजच्या माध्यमातून सुरू असलेल्या कथित मटका व्यवहारांवर नियंत्रण ठेवण्याची मागणी महिलांवर्गातून आणि नागरिकांकडून होत आहे. हा प्रकार नेमका कुठे आणि कोणामार्फत चालतो, त्यामागे कोणाचे जाळे आहे आणि त्यावर संबंधित यंत्रणांचे किती लक्ष आहे,याची माहिती देखील स्थानिक प्रशासनास माहिती असून प्रशासनातील काही कर्मचारी हेच त्यांच्याशी आपले काही हितसंबंध जोपासात असल्याची चर्चा नागरिक खुले पणाने करू लागले आहेत.त्यामुळे स्थानिक प्रशासनावर देखील नागरिक असे प्रश्न उपस्थित करू लागल्याने प्रशासनाने मात्र याला कारवाई न केल्याने मूक संमती आहे की काय असा देखील गंभीर सवाल उपस्थित केला जात आहे.मात्र,या संदर्भातील ठोस माहिती आणि अधिकृत कारवाईचा तपशील संबंधित प्रशासन आणि यंत्रणा यांच्याकडून समोर येणे आवश्यक आहे.
केवळ कारवाईच्या चर्चेने प्रश्न सुटणार नाही !
मटका जुगाराला आळा घालण्यासाठी संबंधित ठिकाणांची माहिती घेउन,कारवाई करणे आवश्यक आहे. त्याचबरोबर नागरिकांनीही झटपट पैसा मिळवण्याच्या आमिषाला बळी न पडता अशा व्यवहारांपासून दूर राहणे गरजेचे आहे.यवत पंचक्रोशीतील कथित मटका जुगाराबाबत पोलीस प्रशासन काय भूमिका घेते, तक्रारींची दखल घेतली जाते का आणि या अवैध धंद्यावर कोणती कारवाई होते, याकडे नागरिकांचे लक्ष लागले आहे.
ओपन-क्लोजच्या नादात घरखर्च आणि बचत धोक्यात येत असेल, तर या प्रकाराला वेळीच आळा घालणार कोण?
यवत, भांडगाव, खुंटबाव, खोर, देलवडी,खामगाव, गाडमोडी,राहू या पंचक्रोशीतील मटका जुगारावर निष्पक्ष आणि प्रामाणिकपणे कारवाई होणार का? आढळल्यास संबंधितांवर कायद्यानुसार कारवाई करावी, अशी अपेक्षा नागरिकांकडून व्यक्त होत आहे.

मुख्य संपादक:






















