संघर्ष नायक वृत्तसेवा पारगाव ता. २८
दौंड तालुक्यातील पारगाव येथे शुक्रवार (दि. २७) रोजी श्री काळ भैरवनाथ महाराज मंदिराचा भव्य कलशारोहण सोहळा उत्साहात पार पडला. या धार्मिक कार्यक्रमाला ग्रामस्थांची मोठ्या प्रमाणावर उपस्थिती लाभली होती.
या सोहळ्याचे प्रमुख आकर्षण म्हणजे श्री सिद्ध सद्गुरू शांतिनाथ महाराज (पंढरपूर) यांच्या हस्ते श्री काळ भैरवनाथ महाराज व जोगेश्वरी माता यांच्या मूर्तींची प्रतिष्ठापना व कलशारोहण विधी संपन्न झाला. धार्मिक वातावरणात मंत्रोच्चारांच्या गजरात हा विधी पार पडला.
यानंतर मंदिरातील देणगीदारांच्या नावांच्या फलकाचे अनावरण माजी आमदार रमेश थोरात व शांतिनाथ महाराज यांच्या हस्ते करण्यात आले. उपस्थित भाविकांसाठी महाप्रसादाचे आयोजन करण्यात आले होते. सायंकाळी ह. भ. प. डॉ. सुदाम महाराज पानेगावकर यांच्या कीर्तनाने कार्यक्रमाची सांगता झाली.
या कार्यक्रमासाठी माजी आमदार रमेश थोरात,जिल्हा परिषद अध्यक्ष विरधवल जगदाळे, जिल्हा परिषद सदस्या डॉ. गायत्री खळदकर, पंचायत समिती सदस्या मनीषा ताकवणे,ओंकार शुगर चे संचालक ओम बोत्रे पाटील, भीमा पाटसचे संचालक तुकाराम ताकवणे,माजी पंचायत समिती सदस्य सयाजी ताकवणे हभप दादा महाराज साठे आदी मान्यवरांनी उपस्थिती लावली होती.
ग्रामस्थांच्या सहकार्याने सुमारे २८ लाख रुपये खर्च करून ४१ फूट उंचीचे हे भव्य मंदिर उभारण्यात आले आहे. बोत्रे परिवाराचे कुलदैवत असलेल्या श्री काळ भैरवनाथ मंदिरासाठी बोत्रे परिवारातील दानशूर व्यक्तींनी १० गुंठे जागा विनामूल्य उपलब्ध करून दिली असल्याचे सरपंच सुभाष बोत्रे यांनी सांगितले.

मुख्य संपादक:























