सासवड संघर्ष नायक वृत्तसेवा ता.०६
सासवड पोलीस ठाण्याच्या हद्दीत येणाऱ्या उदाचीवाडी (ता. पुरंदर) येथे आज पहाटे घराबाहेर येऊन गावठी कट्ट्याने गोळीबार केल्याची खळबळजनक घटना घडली आहे. या प्रकरणी सासवड पोलीस ठाण्यात गुन्हा दाखल करण्यात आला आहे.
या घटनेतील फिर्यादी विकी मुरली राजपूत (वय ३०, रा. उदाचीवाडी, ता. पुरंदर, जि. पुणे) हा पूर्वी वाकड व चाकण परिसरात राहून भोसे-चाकण येथे वडापावचा व्यवसाय करीत होता. मात्र गेल्या दोन महिन्यांपासून तो आपल्या आई उषा मुरली राजपूत यांच्या सोबत उदाचीवाडी येथे राहण्यास आलेला आहे.
पोलिसांनी दिलेल्या माहितीनुसार, विकी राजपूत याचा वाकड व चाकण येथील जागेवरून त्याचा मावसभाऊ पृथ्वीराज उत्तरसिंग राठोड व काका उत्तरसिंग रामकुमार राठोड (दोघेही रा. भोसे, चाकण, ता. खेड, जि. पुणे) यांच्याशी दीर्घकाळापासून वाद सुरू आहे. याच वादातून सदर घटनेला तोंड फुटल्याचा संशय व्यक्त करण्यात येत आहे.
आज पहाटे अंदाजे ५.३० ते ६.०० वाजण्याच्या सुमारास पृथ्वीराज राठोड व उत्तरसिंग राठोड हे दोन्ही आरोपी विकी राजपूत याच्या उदाचीवाडी येथील घराबाहेर आले. यावेळी त्यांनी गावठी कट्ट्याने घराच्या दिशेने गोळीबार केला. या घटनेत दोन राउंड फायर झाल्याचे निष्पन्न झाले आहे.सुदैवाने या गोळीबारात कोणतीही जीवितहानी किंवा जखमी झाल्याची घटना घडलेली नाही. मात्र पहाटेच्या सुमारास झालेल्या या फायरिंगमुळे संपूर्ण परिसरात भीतीचे वातावरण पसरले होते.
माहिती मिळताच सासवड पोलीस ठाण्याचे पोलीस निरीक्षक कुमार कदम यांच्या मार्गदर्शनाखाली पोलिसांनी घटनास्थळी धाव घेऊन पंचनामा केला. घटनास्थळावरून गोळीबाराचे पुरावे गोळा करण्यात आले असून आरोपींना तात्काळ अटक करण्यात आली.
या घटनेमुळे ग्रामीण भागात बेकायदेशीर शस्त्रांचा वाढता वापर आणि कौटुंबिक वादातून हिंसक प्रकार घडत असल्याबाबत चिंता व्यक्त केली जात आहे. सासवड पोलीस पुढील तपास करीत आहे.
मुख्य संपादक:
