संघर्ष नायक वृत्तसेवा यवत
यवत पोलिसांनी आणि कोल्हापूर अंमली पदार्थांविरोधी पथकाने मोठी कारवाई करत खामगाव येथून तब्बल ४ लाख ८७ हजार ९०० रुपये किमतीचा गांजा जप्त केला असून या प्रकरणात एका आरोपीला अटक करण्यात आली आहे, तर दुसरा आरोपी फरार आहे.मिळालेल्या माहितीनुसार, यवत पोलिस स्टेशन हद्दीतील खामगाव येथील पाण्याच्या टाकीजवळील पत्र्याच्या शेडमध्ये अवैधरित्या गांजा साठवून विक्री केली जात असल्याची गुप्त माहिती अमली पदार्थ विरोधी पथकाला आणि यवत पोलिसांना मिळाली होती.या माहितीच्या आधारे पथकाने तात्काळ छापा टाकला.छाप्यामध्ये आकाश अशोक मोहिते (वय २३, रा. खामगाव) हा संशयास्पद अवस्थेत गांजा विक्री करत असल्याचे आढळून आला.त्याची झडती घेतली असता, त्याच्याकडून व शेडमधून ८ किलोपेक्षा जास्त वजनाचा गांजा हस्तगत करण्यात आला.जप्त केलेल्या अंमली पदार्थाची किंमत ४ लाख ८७ हजार ९०० इतकी असल्याचे पोलिसांनी सांगितले.
चौकशीत आरोपी आकाश मोहिते याने हा गांजा सागर उत्तम चव्हाण (रा. खामगाव, ता. दौंड) याचा असून त्याच्या सांगण्यावरून विक्री करत असल्याची कबुली दिली.यावरून पोलिसांनी दोघांविरुद्ध एन.डी.पी.एस. कायदा व बी.एन. एस. २०२३ अंतर्गत गुन्हा दाखल केला आहे.पोलिसांनी आकाश मोहिते याला अटक करून न्यायालयात हजर केले असता, न्यायालयाने त्याला ३१ मार्चपर्यंत पोलीस कोठडी सुनावली आहे.दरम्यान, फरार आरोपी सागर चव्हाण याचा शोध सुरू असून पुढील तपास पोलीस उपनिरीक्षक विजय कोल्हे करीत आहेत. ही कारवाई पोलीस निरीक्षक नारायण देशमुख यांच्या नेतृत्वाखाली पोलीस उपनिरीक्षक विजय कोल्हे, अक्षय मोरे, पोलीस हवालदार गुरुनाथ गायकवाड, संदीप देवकर, गणेश कुतवळ, दत्ता काळे, हिरालाल खोमणे तसेच अंमली पदार्थ विरोधी पथक, कोल्हापूर परीक्षेत्र यांच्या संयुक्त पथकाने यशस्वीरीत्या पार पाडली.
मुख्य संपादक:
