संघर्ष नायक वृत्तसेवा उरुळी कांचन ता. १५ :
डॉ.बाबासाहेब आंबेडकर यांच्या १३५ जयंतीनिमित्त उरुळी कांचन परिसरात सामाजिक बांधिलकी जपत अण्णा भाऊ साठे क्रांती फोर्सतर्फे मोफत रिक्षा प्रवासाची सेवा देण्यात आली. या उपक्रमाचे आयोजन संघटनेचे जिल्हअध्यक्ष अनिल कांबळे व त्यांच्या मित्र परिवाराच्या वतीने करण्यात आले.
भीम जयंतीच्या पार्श्वभूमीवर उरुळी कांचन ते हडपसर आणि हडपसर ते उरुळी कांचन असा मोफत रिक्षा प्रवास देण्यात आला होता.गावात विविध कार्यक्रमांचे आयोजन करण्यात आले होते. या कार्यक्रमांना येणाऱ्या नागरिकांना सुलभ व विनामूल्य प्रवासाची सुविधा मिळावी, या उद्देशाने हा उपक्रम राबविण्यात आला. सकाळपासूनच रिक्षा चालकांनी स्वखर्चाने सेवा देत प्रवाशांना गावातील विविध भागात तसेच कार्यक्रम स्थळांवर पोहोचवले.
या उपक्रमाला नागरिकांचा उत्स्फूर्त प्रतिसाद मिळाला. विशेषतः ज्येष्ठ नागरिक, महिला आणि विद्यार्थ्यांनी या मोफत सेवेमुळे दिलासा मिळाल्याची भावना व्यक्त केली. सामाजिक एकात्मता आणि आंबेडकरी विचारांचा प्रसार करण्यासाठी अशा उपक्रमांची गरज असल्याचे मतही अनेकांनी व्यक्त केले.
अनिल कांबळे यांनी सांगितले की,आदरणीय सचिन भाऊ साठे यांच्या मार्गदर्शनाखाली आम्ही आणि मित्रपरिवार समाजकार्य करत असतो.“भीम जयंती हा केवळ उत्सव नसून समाजप्रबोधनाचा दिवस आहे. याच भावनेतून आम्ही दरवर्षी काहीतरी वेगळा सामाजिक उपक्रम राबविण्याचा प्रयत्न करतो.”
या उपक्रमामुळे उरुळी कांचन परिसरात सामाजिक ऐक्याचा संदेश पसरला असून नागरिकांकडून आयोजकांचे आणि मित्रपरिवाराचे सर्वत्र कौतुक करण्यात येत आहे.
मुख्य संपादक:
