संघर्ष नायक वृत्तसेवा इंदापूर ता.१५ :
इंदापूर व करमाळा तालुक्यात अवैधपणे गौणखनिज वाळूचे उत्खनन करून शासनाच्या महसुलाला मोठा फटका देणाऱ्या सराईत वाळुतस्करावर अखेर कठोर कारवाई करण्यात आली आहे. युवा उर्फ विवेक राजेंद्र फलफले (वय ३१,रा.गलांडवाडी नं.१,ता.इंदापूर,जि.पुणे) याला महाराष्ट्र प्रतिबंधक कायदा (एमपीडीए) अंतर्गत स्थानबद्ध करून नागपूर मध्यवर्ती कारागृहात रवानगी करण्यात आली आहे. या कारवाईमुळे अवैध वाळू उपसा करणाऱ्यांमध्ये मोठी खळबळ उडाली आहे.
पुणे ग्रामीणचे पोलीस अधीक्षक संदीप सिंह गिल्ल यांनी मागील पाच वर्षांतील संघटित गुन्हेगारीचा आढावा घेत सराईत गुन्हेगारांवर कठोर कारवाईचे आदेश दिले होते. जामिनावर सुटून पुन्हा गंभीर गुन्हे करणाऱ्या आरोपींची माहिती संकलित करून त्यांच्यावर एमपीडीए अंतर्गत कारवाई करण्याच्या सूचना सर्व पोलीस ठाण्यांना देण्यात आल्या होत्या. त्यानुसार दरोडे, लूटमार, खंडणी, खुनाचा प्रयत्न तसेच अवैध वाळू उत्खनन करणाऱ्यांवर विशेष लक्ष केंद्रित करण्यात आले.
इंदापूर पोलीस ठाण्याच्या हद्दीत राहणाऱ्या विवेक फलफले याच्यावर यापूर्वी सहा गंभीर गुन्हे दाखल आहेत. त्यामध्ये संगनमताने मारहाण, चोरी, जलमार्गाने वाळूची चोरी, पर्यावरणाला हानी, सरकारी कामात अडथळा तसेच खुनाचा प्रयत्न अशा गंभीर स्वरूपाच्या गुन्ह्यांचा समावेश आहे. त्याच्या वाढत्या गुन्हेगारी कारवायांमुळे सार्वजनिक सुव्यवस्थेला धोका निर्माण होत असल्याचे स्पष्ट झाल्यानंतर त्याच्यावर एमपीडीए अंतर्गत प्रस्ताव सादर करण्यात आला.
पोलीस निरीक्षक विलास नाळे यांनी हा प्रस्ताव वरिष्ठांकडे पाठविला होता. त्यानंतर जिल्हाधिकारी जितेंद्र डुडी यांनी प्रकरणाचे परीक्षण करून आरोपीस स्थानबद्ध करण्याचा आदेश ७ एप्रिल २०२६ रोजी दिला. आदेशानुसार पोलिसांनी विशेष पथक तयार करून आरोपीचा शोध घेतला व ८ एप्रिल रोजी त्याला ताब्यात घेण्यात आले. पुढे त्याची नागपूर मध्यवर्ती कारागृहात रवानगी करण्यात आली.
ही कारवाई अपर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड पोलीस निरीक्षक प्रमोद क्षीरसागर स्थानिक गुन्हे शाखा पुणे ग्रामीण, पोलीस निरीक्षक विलास नाळे, इंदापुर पोलीस स्टेशन,पोलीस उपनिरीक्षक पुंडलीक गावडे, पोलीस उपनिरीक्षक दत्तात्रय लेंडवे, इंदापुर पोलीस स्टेशन, सहा. पोलीस उपनिरीक्षक महेश बनकर, पो.हवा अभिजीत एकशिंगे, स्थानिक गुन्हे शाखा, पुणे ग्रामीण, पो हवा सलमान खान, संतोष शिंदे,पोलीस अंमलदार लक्ष्मण सुर्यवंशी,सागर क्षिरसागर यांनी केलेली आहे.
दरम्यान, या कारवाईमुळे इंदापूर व करमाळा परिसरातील अवैध वाळू उत्खनन करणाऱ्यांवर मोठा धाक बसला असून, अशा प्रकारच्या बेकायदेशीर व्यवसायांवर भविष्यातही कठोर कारवाई सुरू राहणार असल्याचा इशारा पोलिसांनी दिला आहे.
मुख्य संपादक:
