संघर्ष नायक वृत्तसेवा यवत ता. १०
पुणे ग्रामीण स्थानिक गुन्हे अन्वेषण शाखेने यवत पोलीस ठाणे हद्दीतील पाटस चौकी परिसरात धडक कारवाई करत अवैधरित्या गावठी पिस्तूल बाळगणाऱ्या एका आरोपीला अटक केली. त्याच्याकडून एक गावठी बनावटीचे पिस्तूल व एक जिवंत काडतूस असा एकूण १८ हजार ५०० रुपयांचा मुद्देमाल जप्त करण्यात आला.
स्थानिक गुन्हे शाखेचे पथक यवत पोलीस ठाणे हद्दीत नियमित गस्त घालत असताना पोलीस हवालदार गुरुनाथ गायकवाड यांना गोपनीय माहिती मिळाली. त्यानुसार, सनी कुमार केसरी प्रसाद (रा. डोमणीमऊ, मोहम्मदपूर नोगवाँ, इलाहाबाद, उत्तर प्रदेश) हा पाटस येथील चांगुना हॉटेलसमोर गावठी पिस्तूल घेऊन उभा असल्याची माहिती मिळाली.
माहितीची खातरजमा करून स्थानिक गुन्हे शाखेच्या पथकाने घटनास्थळी सापळा रचला. संशयितास ताब्यात घेऊन त्याची अंगझडती घेतली असता त्याच्याकडून एक गावठी बनावटीचे पिस्तूल व एक जिवंत काडतूस आढळून आले. पोलिसांनी तात्काळ शस्त्र जप्त करून आरोपीला अटक केली.
याप्रकरणी आरोपीविरुद्ध भारतीय हत्यार कायद्यान्वये कलम ३ व २५ अन्वये गुन्हा दाखल करण्यात आला असून पुढील तपास सुरू आहे.
ही कारवाई पुणे ग्रामीणचे पोलीस अधीक्षक संदीप सिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी बापूराव दडस तसेच स्थानिक गुन्हे शाखेचे पोलीस निरीक्षक प्रमोद क्षीरसागर यांच्या मार्गदर्शनाखाली सहाय्यक पोलीस उपनिरीक्षक सचिन घाडगे, असिफ शेख, पोलीस हवालदार गुरुनाथ गायकवाड, सुभाष राऊत, योगेश नागरगोजे आणि विकास कापरे यांनी पार पाडली.
मुख्य संपादक:
